Shillong, Jylliew 12: Ka J J M Nicholsroy Memorial Committee (JJJMNMC) ha ka sngi Thohdieng ka la kynmaw burom ïa ka lyngkhuh sngikha ba 142 snem jong u Rev. J J M Nicholsroy ha kaba la kha ïa u ha u snem 1884.
Ïa kane ka prokram la pynlong hakhmat u dur mot jong u, uba don ha Lariti kaba don ha Mawdiangdiang New Shillong, hapoh ka jingpynïaid jong u Bah Ransom Sutnga kum u Chairman ka Committee, ka jingïadonlang u Rev. Pastor A C More, u Rev. Pastor P Pohsngap, Pastor Marwein, nangta ki riew rangbah napoh ka Balang Presbyterian na Diengpasoh bad kiwei kiwei.
Na ka liang u Rev. Pastor A C more uba la ai jingduwai bad uba la kren u la ong ba kane kan long kaba sah jingkynmaw, khamtam ïa u shakri jong u Blei u Bah Joy.
“Katba ka pyrthei ka dangsah, ka ri bad ka jaitbynriew ruh kan dang sah. U (L) Bah Joy udei ka jingim kaba u Blei u la pyndonkam na ka bynta jong ngi lang baroh. Haba u dang im u la ong ba kam don ka jingïapher bapdeng ka secular bad u Kristan, naba kum ki Kristan ki bud ïa ki jinghikai U Jisu Krist ban shakri. Aiba kaei kaba u Bah Joy u la sdang kan dang ïaibteng bad ka jingaiti jong u kan ïaineh shaduh ka bymjukut,” ula ong.
Na ka liang jong u Secretary ka Committee u Bah Eugene u la ong ba ka jaitbynriew ka la pynmih ïa u Bah Joy uba mynta u la long ka jingkyrkhu ïa ka jaitbynriew, ka jinglah ban pynrung ïa ka 6 schedule kaba la long ka jingmyntoi ïa ka Manipur, Meghalaya bad Assam.
“Kane ka dei ka sngi kaba khraw tam hynrei ha kajuh ka por pat kan long kaba sngewsih ba mynta la ikumba la don kiba la thap ban klet ïa ka jingnoh synniang jong u. Ngi la pyrshang ban pynrung ïa ka ktien Khasi haduh mynta ngim lah, hynrei u Bah Joy marwei ula pynrung syndon ïa ka 6th Scheduled hapoh ka riti synshar jong ka ri India,” u la ong.
Na ka liang jong u Secretary u la ai khublei ïa ka Kong Doreen Lyngwa Director Arts and Culture ba ïa la kyrshan ïa kane ka sngi bad kyntiew ïa ka arts and culture.
La ïoh ka jingkren na uwei na ki riew rangbah jong ka Balang Presbyterian Diengpasoh.
Katba u Rev. Pohsngap u la ai khublei ïa ka Memorial Committee hapoh ka jingïalam jong u Bah Ransom ba kan dang lah ban trei khambha shuh shuh ban kyntiew ïa une u riewkhraw wat la um don shuh ha kane ka pyrthei hynrei u la ieh ki dienjat na ka bynta ka jaitbynriew ban pynneh pynsah ïa la ki matti u mynbarim.
Hadien ba la dep ban buh ia ki syntiew ban leh burom ia u (L) Rev. J J M Nicholsroy u Chairman ka Committee u Bah Ransom Sutnga u la ai khublei ïa baroh kiba la shim bynta ha kane ka sngi.
Ha kajuh ka por u Rev. Pastor Marwein, u la pynpaw ka jingai nguh ïa U Blei ba u la sei ïa u Bah Joy kum u briew uba kynsai uba la long ka jingkyrkhu haduh kane ka pateng jong ka jaitbynriew.
The post Watla ym pat rung ïa ka ktien Khasi, u Bah Joy u la pynrung syndon da ka 6th scheduled ha riti synshar ka ri first appeared on Mawphor.