Nongstoiñ, Jylliew 12: Ka surok ban leit sha Langpih ka la jot rathai kat nang mih ki sngi bad la isangsot haduh katta katta, ha kaba ki nongshong shnong katei ka thaiñ kiba ïaid lyngba katei ka surok man ka sngi ki la shem jingeh shibun khamtam eh ha kane ka aïom lyiur.
Ki katto katne ki bynta kiba katei ka surok ka la jot palat ki long naduh ba sdang ka shnong Thawïar ter ter haduh Langpih, ha kaba kumba 80 na ka 100 ka surok ka la jot rathai bad ym sah rong shuh wat khyndiat ruh bad la ïohi ruh ba ki kali khamtam ki kali rit ki la shu ïa ksaid ban poi sha ki jaka ba ki thmu.
U nongthoh khubor haba ïoh ban kylli pyrthew ruh na ki katto katne ki draibar taxi kiba dei ïaid lyngba katei ka surok, kiba la ong ba ka surok ka lah sniew shaba palat nalor ba lah kiew dor ka Umphniang. Pynban hap ban ïaid da u 1st gear bad 2nd gear bun bun sien, namar ym lah shuh ban pyndokam ki 3rd ne 4th gear haba sniew ka surok. Ka jingleit jingleit kaba ju shim por tang 10 minit ban poi ha ki jaka ba ki thmu leit, pynban ka bam por haduh shiteng kynta tam.
U bah Smalingstar Kharsangleiñ u draibar uwei na ki draibar taxi u la ong, “Isynei bad I sangsot khamtam ïa kiba shitom ba pang nalor ki hap ban siew ïa ka dor kaba heh, hynrei na ka liang jong ngi ki nongñiah kali kamai ruh ngim lah leh ei ei namar ka ktah lut ïa baroh tang na ka daw jong kane ka surok”.
Kumban shu pynkynmaw ba la ïoh ïa katei ka surok ba la jot rathai mynta da ka jingïaumsnam, namar dei tad hadien ba la duh ei noh haduh saw tylli ki mynsiem kiba kordor kiba la shah siat ïap ha ki ki pulit Assam, la lah ban pynurlong ban tih bad shna ïa katei ka surok kata ha u snem 2010″.
The post Mynta pat syrtok ki paidbah bad kali kamai ka thaiñ Langpih ba lajot rathai first appeared on Mawphor.