Khliehriat jylliew 12: Ka long kaei kaei kaba sngew lyngngoh kumba la iathuh bad kynnoh da ki dkhot bad ki nongialam jong ka Jaiñtia Coal Owners, Miners and Suppliers Workers Association ba ki bor district jong ka East Jaiñtia Hills District ki la phah pynban da u doctor mrad ba na ka tnat Veterinary ban kylli ïa ka jinglong jingman ka koit ka khiah jong u bah Marshall Biam uba dang shong shahthngan ha Ladrymbai Dongwah ban pynbor ïa ka sorkar ban plie noh ïa u dewïong.
Haba kren sha ki pathai khubor, u bah Marshall Biam u la ong ba hynnin ka sngi bad mynta ka sngi ruh la wan da u doctor jong ki mrad bad u kylli ïa ka jinglong jingman ka koit ka khiah “Ngam sngewthuh sngewthaw shuh na ka liang ki bor district bad na ka ophis u DM&HO ngam lah ban tip kaei ka jingthmu jong ki” ong u bah Marshall Biam.
Ka longkmie kaba la wan ban ai mynsiem ia u bah Marshall Biam, ka kong R.Syntem ka la pynpaw ka jingsngewkhia ïa kane ka jingwan jngoh ki doctor veterinary ïa u bah Marshall Biam bad ka la ong ba “Ngi pynrem jur ïa ka jingwan ki doctor veterinary ha ka jingshisha ki la dei ban sngewthuh, namar lada dei u briew te hap wan hi da u doctor briew, lada dei u mrad te hap wan da u doctor mrad, u bah Marshall u dei u briew, kane ka jingphah ki bor kiba halor ka pyni shai ba ki niew beiñ, ka la kheiñ mrad kam kheiñ briew shuh, ki la don bun kiba shong shahthngan ki wan da ki doctor kiba heh kiba dei shisha ki doctor hynrei ïa u bah Marshal pat ki phah da ki doctor mrad, kumta ngi kyrpad ïa ka sorkar ba kam dei ban da ñiew poh palat bad sngewbha ban ai lem ka jingkyrshan bad sngewlem ïa ki rit ki ria namar kane ka dei ka iap ka im jong ki paidbah ka ri lum Jaiñtia”
Kumjuh ruh uwei u rangbah uba kyrteng u bah Briwell Bareh, u la ong ba kine ki doctor ki dei kiba la phah da ka sorkar, hynrei ki dkhot kim shah ban examin bad ong ba u la wan ar sien ban peit ïa u bah Marshall.
Kum ban pynkynmaw ba kane ka jingshong shahthngan u bah Marsall Biam ka dei ka jingiakhih ban pynbor ïa ia ka sorkar ban plie noh ïa u dewïong, namar ïa ka jingtih dewïong bad jingkhaii dewïong la khang da ka NGT naduh u snem 2014 bad kane ka jingshah thngan jong u bah Masrhall Biam ka la sdang naduh ka 1 tarik mynta u bnai jylliew naduh ka por 10 baje mynstep bad ka seng ka la shim ïa kane ka synjam ban pynpaw bad pynsngew sha ka sorkar ïa ki jingeh ba ki paidbah ki mad na ka daw ka jingshah khanglad ban tih bad shalan dewïong.
The post Kynnoh ka JCMSWA ba phah da u Doktor mrad ban peit ïa ka koit ka khiah u bah Marshal S.B.Biam first appeared on Mawphor.