Shillong, Jylliew 12: Ka State Disaster Response Force (SDRF), Meghalaya, hadien ka jingtwa khyndew ha kawei ka jaka shna ïing ha Mawdiangdiang, East Khasi Hills District, ha ka 12.06.2026, kila leit na ka bynta ban wad bad ban ioh pyllait im.
Ïa ka jingtip ha kaba ïa dei bad kane ka jingjia la ioh na ka bor pyniaid jong ka District Disaster Management Authority (DDMA), East Khasi Hills.Da kaba leh kloi, la phah mardor ïa ka kynhun jong ka SDRF ba la ïalam da u Inspector T. Tynsong sha katei ka jaka bad la poi ha ka por 2:42 PM.
Katkum ka jingpeit bniah ba nyngkong ka la pynpaw ba ki nongtrei ki dang trei ia ka kam tih khyndew na ka bynta ka nongrim iing haba ka khyndew kaba la pyndap na ka bynta ba shalor jong ka jaka ka la hap kynsan shapoh ka thliew tih khyndew.
Ha katei ka jingjia, uwei u nongtrei u la sahkut hapoh ki thliew bad hadien kumba shi kynta ka jingtrei borbah, ka kynhun SDRF ka la lah ban sei ïa utei u briew napoh thliew ha ka por 4:10 PM.
Hadien kane la aiti noh ïa ka met sha ki bor ba dei peit bad ki nongtrei Ambulance ha ryngkat ka jingdon lang ki heh na ka Mawdiangdiang Police Outpost, u Headman ka Mawdiangdiang, u trai jaka, bad ki paralok ba ïatreilang bad une u lanot.
Kane ka long katkum ka kyrwoh khubor na u Bah PH Shylla uba dei u Senior Staff Officer & Addl. PRO ka Directorate of Civil Defence & Home Guards Meghalaya, Shillong.
The post Ïap u rangbah ba ban khyndew katba dang tih thliew nomgrim ïing ha thaiñ Mawdiangdiang first appeared on Mawphor.