Shillong, Jylliew 4 : U Myntri Rangbah ka Jylla Conrad K Sangma ha ka sngi Palei, ula kyntu ia ka Sorkar Pdeng ba kan pynlong ïa ka jingïasyllok kaba kham ïar halor ka Foreign Contribution (Regulation) Amendment Bill, 2026, haba pynpaw ïa ki jingsngewkhia na ki kynhun bapher bapher khamtam eh na ki seng niam ha Meghalaya halor ki kyndon ba don ha kane ka Bill, khamtam kito kiba ïadei bad ka jingkurup ïa ki nongkynti jong ki seng niam ne kynhun niam.
Ha ka dorkhas ba la aiti sha u Myntri kam Pohïing ka Ri u Amit Shah, u Conrad ula ong ba katto katne ki kynhun ki la pynpaw ïa ka jingpyrshah ïa ki “katto katne ki kyndon jong ka Bill, khamtam halor ka bor ban kurup ïa ki nongkynti”.
“Kiba bun ki kynhun kynthup kito kiba dei na Jylla Meghalaya ki la pynpaw ka jingsngewkhia haba ïadei bad ki katto katne ki kyndon jong ka Bill” ong ka dorkhas haba bynrap ba ka Sorkar Jylla kala dep ïakren ïa kane ka kam bad ka Sorkar Pdeng.
“U Myntri Rangbah ula ïakynduh ruh ïa u Myntri ka Minority Affairs ban pyntip ïa kine ki jingsngewkhia”, ong ka dorkhas.
Ka Foreign Contribution (Regulation) Amendment Bill, 2026 ka thmu ban pynkylla ïa ka FCRA ba don mynta, kaba teh kyndon ïa ka jingbei pisa nabar ri ïa ki Seng trei monsngewbha bad kiwei kiwei.
Haba kyrpad ban phikir hashuwa ban mynjur ïa ka Bill, u Myntri Rangbah ula kyrpad ïa ka Sorkar Pdeng ban ïakren bad bun ki kynhun kiba don bynta ha ka kam.
The post Pynpaw u CM ïa ka jingsngewkhia ha u Shah halor ka kyndon ban kurup ïa ki Nongkynti ki Seng Niam first appeared on Mawphor.