Shillong, Jylliew 4 : U Myntri Rangbah ka Jylla u Conrad K Sangma ha ka sngi Palei, ula kyntu ïa u Myntri kam Pohïing ka Ri Amit Shah ban pynthikna ba ki jingai jingmut jong ka Meghalaya kin rung ha ka Constitution (One Hundred and Twenty-Fifth Amendment) Bill, 2019, kaba tyrwa ban pynbun ïa ka jingdon ki MDC ha ki lai tylli ki Autonomous District Council (ADC) ka Jylla.
Ha ka dorkhas ba la aiti ha u Amit Shah, u Conrad ula ong ba ka Sorkar Jylla “ka la bishar bniah bha” ïa ka bill bad shim rai ïa ka nongrim jong ka hadien ka jingïasyllok kaba janai bha bad ki kynhun bapher bapher bad ki jingïalang kiba bun bad ki ADC.
“Ka Sorkar Meghalaya ka kyrpad ïa ka Sorkar pdeng ban pynrung ïa ki jingai jingmut ha ka The Constitution (One Hundred and Twenty-Fifth Amendment) Bill, 2019,” ong u Conrad.
Haba kyrshan ïa ka jingpynheh ïa ki Council, u Conrad ula pynpaw ïa ka jingbym hun ïa ka nombor ba la tyrwa da ka Sorkar Pdeng na ka bynta ar na ki lai tylli ki ADC.
Na ka bynta ka Garo Hills Autonomous District Council (GHADC), ka Bill ka tyrwa ban kyntiew ïa ka jingdon ki MDC na ka 30 sha ka 42 ngut ba kynthup ïa 36 ngut ba jied u paidbah bad 6 ngut ba shu thung hi.
“Ka jingsngew jong ka Sorkar Meghalaya ka long ba ka GHADC ka dei ban kynthup ym palat ïa 40 ngut ki dkhot, ia kaba 36 kin dei kiba shah jied ha u paidbah lyngba ka elekshon. U Lat un sa jied ïa 4 ngut ki dkhot ha kaba kumba 2 ngut kin dei ki kynthei” ong ka dorkhas.
Na ka bynta ka KHADC, ka Sorkar ka mynjur bad ka jingtyrwa ha ka Bill ban don 40 ngut ki dkhot-36 ngut kiba shah jied ha u paidbah bad 4 ngut kiba shu thung ha kaba arngut kin dei ki kynthei napdeng kiba shu thung.
Na ka bynta ka JHADC, u Conrad ula tyrwa ban pynkiew tang khyndiat ban ïa kaei kaba la pynpaw ha ka Bill. Ka Sorkar Pdeng kala tyrwa 34 ngut ki dkhot-30 ngut kiba shu jied paidbah bad 4 ngut kiba shu thung.
“Ka jingsngew jong ka Sorkar Meghalaya ka long ba na ka bynta ka JHADC, ka jingdon ki MDC dei ban pynkiew sha ka 32 ngut ha kaba 2 ngut kin dei kiba shu thung ïa kaba kawei ka shuki kan long sha ki kynthei” ong u Conrad.
“Kane ka jingsngew ban don 32 ngut ki dkhot ha JHADC haba nujor bad mar 40 ha KHADC bad GHADC, ka dei kaba la pyn shong nongrim na ka jingdon paid bad ka jingheh jong ka JHADC, kaba kham rit ban ïa ka KHADC bad GHADC” ula ong.
U Conrad ula pynpaw ruh ïa ka jingpyrshah ïa ka kyndon ba don ha ka Bill ban jied ïa ki dkhot jong ki jaidbynriew riewlum ki bym don nongmih khmat ne Unrepresented Tribe sha ki ADC, haba pynksan ba ka jingbun ki riewlum ha Meghalaya ka long ka jingeh ban ai ïa ka bhah.
“Ki don haduh 17 tylli ki riewlum ba heh paid ha Jylla Meghalaya bad katto katne ki riewlum kum ki Kuki ruh ki don haduh 37 ki sub-tribe” ula ong.
Ha ka jaka kane, ka Sorkar ka la tyrwa ba ïa ki dkhot ba shu thung dei ban jied na ki kynhun ba kynthup ïa ki riewstad ha ka pule puthi kiba paw, ki nongialehkai, ki kynthei kiba khlieh ha ka jingpynïaid kam bad ki nongsengkam ba paw lane ki riewshemphang.
The post Ai jingkyrshan u Myntri Rangbah ban kyntiew ïa ka jingbun paid ha ki ADC first appeared on Mawphor.