Nongpoh, Naitung 20: Haka por ba bun naki paidbah ki dang shongshit ban sakhi ïaka phainal jong ka jinglehkai world cup, katto katne ki shnong kila hap ban mad ïaka jingjynjar bad sohsat ban phetrieh hapdeng u lapbah namar ka jingkiew ka umsaw hynne ka miet shuwa ban kynjat shai hadien ka jingther u lapbah bala neh bun kynta kaba la wanrah ruh ka jingujor bad ka jingshah ktah bun ki iing ki sem haka thaiñ Umling, Umladoh, bad kiwei kiwei ki jaka ha Ri-Bhoi District.
Katkum ka jingtip bala ioh lum la ong ba kane ka jingjia kala jia shuwa ban shai ka bneng ha kaba ka umsaw kala kiew kynsaw naka wah bad kiew shaduh ki iing ki sem jong ki briew kiba la bunkam pat ban phetrieh ïalade bad don ruh ki kmie ki kpa kiba hap ban rah ryngkat ki khunrit bad iehnoh ïaki tiar ki tar bad ki jingdon jingem baroh ha kaba ka umsaw kala rong naphang ïaki tiar ki tar naki iing ki sem.
Nalor ki iing briew kawei ka jaka sumar jong ka sorkar kaba la tip kum ka Umling Health and Wellness Centre kala shah ktah jur hadien ba ka umsaw kala rung lut ha baroh ki bynta jong ka jaka treikam katei ka jaka sumar haduh ba baroh ki tiar ki tar naduh ki mashin, ki kot ki sla ba donkam kiba la buh bha ha duli kila sniew lut naka jingrung ka umsaw bad ka ahor ktieh.
U nongthoh khubor u Mawphor u la ioh ruh ban hiar sha katei ka jaka hadien ba ka um kala kham hiar bad haba ioh ban ïakren bad katto katne ki paidbah la ong ba kane ka dei ka sien ba nyngkong ba ka jingheh ka um kala long kaba shyrkhei namar ka shnong Umladoh bad ka shnong Umling ki dei ki shnong kiba don harud wah kumta ka jingther u lapbah kala pynlong ïa kitei ki wah ban kiew shaduh iing briew.
Kila ong ruh ba naduh dangstep kila bunkam ka pynkhuid ïaka umsaw, ka ahor ktieh bad kane ka dei ka jingshlei um kaba jur tam haba nujor bad ki snem bala leit noh namar ka jingshah kthah ka long kaba shyrkhei nalor ka jingshah rong ki tiar ki tar, kala don ruh ka jingjulor kiba bun bad ka jingduhnoh ïaki kot ki sla jong ki khun, ki kot donkam, ki khaw, ki jhur ki jhep bad kiwei kiwei.
Shuh shuh haba ioh ban ïakren bad ka kong R Ronghang kaba dei ka nurse in charge jong ka Umling Sub-Centre kala ïathuh ba baroh ki tiar ki tar ba donkam naduh ki kot ki sla kila jot bad sniew lut namar ka um kala rung lut baroh ki kamra treikam jong katei ka jaka sumar.
Shuh shuh naka liang ka DMHO ka Ri-Bhoi District ka AR Marak kala leit mar mar ban leit jurip ïa katei ka jaka sumar bad naka liang jong ka kan sa ai ïaka kaiphod sha ka sorkar ban ioh leh ïa kaba donkam khamtam ban ioh biang ki tiar ki tar kiba la duh noh.
The post Shah ktah ki ïing ha Umling, ka Sub-Centre bad julor lut ki dawai, ki kot ki sla first appeared on Mawphor.