Shillong, Jylliew 04 : Ka Khasi Author’s Society (KAS) hapoh ka jingïalam jong u President Dr. DRL Nonglait ki la kynduh ïa u Myntri Kampohiing ka Ri u Amit Shah ha Shillong ban kyrpad ba un tuklar lang na ka bynta ban ai jingithuh noh ïa ka Ktien Khasi ha ka Khyrnit kaba Phra jong ka Riti Synshar jong ka Ri.
Haba kren bad ki lad pathai khubor hadien ka jingïakynduh, u Dr. DRL Nonglait u la ïathuh ba u Amit Shah u la pyntip ha ki ba ka Ktien Khasi ka long kawei na kiba bun ki jait ktien kiba dawa ban rung ha ka Khyrnit kaba Phra bad ba ka Sorkar Pdeng ka dang bishar bniah bha ïa kine ki jingdawa.
U President ka KAS, u Dr. DRL Nonglait, u ba dei ruh u kyrtong jong ka NPP ha kane ka elekshon MP shiteng samoi, u la ïakynduh ïa u Myntri ha Shillong hadien ba la pynbeit ïa ka jingïakynduh lyngba ka ophis jong u Myntri Rangbah ka Jylla.
“Dang hynin ka miet ngi la ïoh jingtip na ka ophis u Myntri Rangbah ba u Myntri Kam Pohïing ka Ri, u Amit Shah un wan sha Shillong. Kumta hi ngi la kyrpad ïa ka ophis u Myntri Rangbah ban ïarap ba ngin ïoh ïa kynduh ïa u. Ngi pynpaw ka jingsngewnguh ba ngi la ïoh ïa ka lad ban kynduh markhmat bad u Myntri Kampohiing ka Ri,” ong u Dr. DRL Nonglait.
La ïathuh ba ha ka jingïakren, ka KAS ka la pynkynmaw ïa u Amit Shah shaphang ka jingïakhun kaba slem jong ki ban ïoh noh ïa ka jingithuh ïa ka Ktien Khasi ha ka Khyrnit kaba Phra.
U la bynrap ba ki la pyntip ruh ïa u halor ki jingkylla kiba dang shen ha ka jylla. “Ngi la pyntip ba la pynlong ïa ka Khasi kum kawei na ki Ktien Sorkar jong ka Meghalaya lyngba ka Meghalaya Languages Ordinance 2026, bad ngi la kyrpad ïa u ban shimkhia ïa kane ka mat bad lada lah ban wanrah ïa ka Bill ha Parliament,” u la ong.
“U la ong ha ngi ba ki don bun tylli kiwei ruh ki jait ktien kiba dawa ban rung ha ka Khyrnit ba Phra bad ba ka Sorkar ka dang shimkhia bha ïa kane ka mat.”
“U la kdew ruh ba ka Ktien Khasi ka long kawei na kiba bun ki ktien kiba don ha ka thup jingdawa,” la bynrap u Dr. Nonglait.
Shuh shuh da kaba pynpaw ba watla um pat ai kano kano ka rai hynrei u Amit Shah u la pynthikna ïa ka kynhun ba ka kam ka dang don hapoh ka jingbishar kaba bniah jong ka Sorkar Pdeng.
“Um shym la buh ïa kano kano ka por, hynrei u la ong ba un sa bishar ïa kane ka mat bad ba ka Ktien Khasi ka long kawei na ki ktien kiba dawa ban rung ha ka Khyrnit kaba Phra,” la bynrap shuh shuh u Dr. Nonglait.
The post Ai jingithuh noh ïa ka Ktien Khasi, markhmat na u Amit Shah kyrpad ka Khasi Author’s Society first appeared on Mawphor.