Shillong, Jylliew 04: Ka Khasi Students Union ha ka sngi Palei ka la leit wah bad rah ruh da ki jingthoh dawa Inner Line Permit (ILP) ha kiba bun ki jaka jong ka Nongbah Shillong ban dawa na U Myntri ka Sorkar Pdeng u Bah Khmih ïa ka Tnat Kam Pohïing u Amit Shah ha ka jingwan ban pynïaid jong u ïa ka jingïalang Plenary jong baroh ki Sorkar jylla kane ka thaiñ shatei lammihngi kaba dang long ha North Eastern Council (NEC) ha Nongrim Hills Shillong.
La ïohi ba ki dkhot ka KSU naduh Umïam Ri Bhoi District shaduh u Mot Kiang Nangbah, Barik, nangta ha thaiñ Polo ha Shillong, ki la rah da ki placard, ki flex harud surok ba dei ïaid lynti u Myntri ka Sorkar Pdeng u Amit Shah.
Katto katne na ki jingthoh ba ki la rah ki ong “Ngi dei ki nongïada ym tang kiba pyrshah, ka thma kan ïai bteng tat haduh ban da ïoh ïa ka ILP.”
Nangta “Dei tang ka ILP ka ban tehlakam ïa ka jingwan poiwir beaiñ, sangeh ka jingthmu tih Uranium,” nalor kiwei kiwei kiba ïadei bad ka jaka sumar ka NEIGRHIMS.
Ha Barik Shillong ruh la ïohi ba ki dkhot ba bun jong ka KSU ki la rah la ki placard bad kiwei ki jingthoh ban pynpaw beit markhmat ïa ki jingdawa ha ka por ba wan ïaid ka kali jong ki Amit Shah ha katei ka por.
Lah ban ong ba wat hapdeng ka jingpyrkhing bad ka jingsyrtap jong ki pulit kaba lah ban long la palat pud bad kane ka la ktah shisha ïa ka ïaid ka ïeng jong ki paidbah babun ha kane ka sngi.
Kane ka jingwah bad rah ïa ki placard da ka seng KSU ka la long ruh kum ha ki thaiñ Lad Shillong Peak, Lad Lummawbah, Umshyrpi, Civil Hospital, Mawlai bad kiwei ki jaka ban pynsngew ïa ka jingsah teng jong ka dawa ïa ka ILP, ka kam ïakajia pud, nangta ka jingthungkam thungjam na ka bynta ki nurse ka jylla ha NEIGHRIMS, nalor kiwei kiwei ki mat.
The post Da ki jingthoh bad placard dawa ILP bad kiwei ki jingdawa rah bad wah ka KSU ha kylleng ki jaka first appeared on Mawphor.