SHILLONG, Jylliew 4: U Myntri kam poh ïing jong ka sorkar pdeng u Amit Shah u la pynthikna ïa ka Khasi Students’ Union (KSU) ba ka Centre ka lah ban tuklar ïa ka jingiakajia pud ka Assam-Meghalaya lada ka jingiakren ha ka kyrdan ki jylla kam lah ban shim rai, bad ba shen yn sa thaw ïa ka kynhun jong ki nongbishar ba la shongthait ka Supreme Court ban rai ban pynrung ïa ki ktien Khasi ha ka Eighth Schedule, la ong u nongialam ka KSU.
Katei ka jingkular ki la wan ha ka jingïakynduh jong u Shah bad ka kynhun jong ka KSU ha Shillong, ha kaba u dang ïashim bynta ha ka Plenary ba 73 jong ka NEC.
U General Secretary ka KSU u samla Reuben Najiar u la ong ba ka Union ka la wanrah bad pynsngew ïa lai tylli ki mat jingdawa.
Halor ka ILP, ka seng ka la ong ïa u Shah ba ka dang dei ka “jingdawa kaba la slem bha.”
“Da ka jingkyndang paidbah ha West Bengal bad Assam, ki briew kiba wan buhai shnong be-aiñ kim leit phai shuh sha Bangladesh hynrei ki wan buhai shnong shawei pat.Ka jylla Meghalaya kam don aiñ ban ïada ïalade.Ka la dei ka por ban pyntreikam ïa ka ILP ban ïada ïa ka jaitbynriew rit paid kiba dei ki trai ri trai muluk jong ki Khasi, Jaiñtia, bad Garos,” ong u samla Najiar.
Ha kaba ïadei bad ka jingïakynad pud, u la ong ba ka Assam ka la “kylla pyrshah” ha ki jaka ba don jingïakynad.
“Ha Lapangap bad sha kiwei, ka Assam ka la leh kum ka nongleh donbor, kaba pynkhein ïa ka jinglong jingman”, la ong u Najiar.U Shah u la pynthikna ïa u ba “lada ka Centre ka lap ba ka jingtreikam kam ïaid lyngba ki lad kiba biang, ka Sorkar India kan tuklar.”.
Halor ka Eight Schedule, u Najiar u la ong ba u Shah u la pynthikna ba katei ka kam ka dang ïaid shakhmat.
“Yn sa thaw ïa ka committee jong ki nongbishar ba la shongthait jong ka Supreme Court ha ki bnai ban wan.Da kumba 100 tylli ki jait ktien kiba kwah ban shah kynthup, ka panel kan shim ïa ka rai ba khatduh”, u la ong.
Haba kylli hato ka jingïalang ka long kaba seisoh, u samla Najiar u la ong, “Ka kam ram jong ngi ka long ban wanrah ïa ki mat kiba dei ki jingeh jong ka jylla.Ka dei ïa ka kamram jong ka jylla bad ka Centre ban eksamin bad ban pyntreikam,”.
U la bynrap, “Ka ILP ka la ïohi ïa ki jingïakhih kiba bun snem.Ka shong mynta ha ka Centre ban pynshai ba dei ban ai ne ym dei ban ai ïa ka ILP.”
Ka KSU ka dang don ka jingkyrmen.”Ka Manipur ka la ioh ïa ka ILP ha u snem 2019.Ngi kyrmen ba ka Meghalaya ruh kan ioh ïa ka ILP ha ki bnai ne ki snem ban wan”, la ong u samla Najiar.
The post Lada ym biang ka jingïakren hapdeng ki jylla halor ka kajia pud, kular u Amit shah ban tuklar ka sorkar pdeng: KSU first appeared on Mawphor.