Shillong, Naitung 19 : U MDC ka BJP na Tura u Bernard N Marak u la ai ka jingkyrshan ba pura ïa ki Nokma ha ri lum Garo kiba daiñ kuna 10 hajar tyngka ïa ki nongbylla ne ki nongtrei kiba wan trei hapoh ka bri jong ki Akhing khlem kano kano ka jingïoh jingbit na kino kino ki Nokma.
U Marak u la ong kane ka jingleh ka long kum shi bynta ban ïada ïa ki trai ri trai muluk bad ban pynneh pynsah ruh ïa ki riti ki dustur jong ki paid Garo.
U la kren bynniaw halor ka jingïoh khubor ba ki don ki nongbylla kiba ïoh ban rung sha ri lum Garo kynthup ha Tura khlem kano kano ka jingïoh jingbit na ki Nokma.
Na ka liang jong u u la pynpaw ba ka jingïoh ban rung khlem ka jingai bor na ki bor synshar ka long kum ka jingbym kheiñ snep ïa ki riti dustur synshar jong ki trai ri kat kum ka Sixth Schedule.
“ ïa ka Sixth Shedule la ohshrong ne la thaw na ka bynta ban ïada ïa ki riti ki dustur jong ki trai ri trai muluk bad kumjuh ruh ïa ki riti synshar jongki. Ha Garo Hills ki Nokma ki dei ki nongsynshar ïa ka bri ki Akhing. Kine ki bor ki pynïaid bad synshar kat kum ki aiñ bad ki pynneh pynsah pat ruh ïa ki riti ki dustur ba la btin lynti da ki longshwa man shwa” ong u Marak.
Kat kum ka Resolution ba la mynjur kino kino ki nongaikam ki dei ban ïoh shwa ïa ka NOC na ki Nokma shwa ban sdang ïa kano kano ka kam hapoh ka bri ki Akhing. Kiba pynkheiñ kin shah daiñ kuna 10 hajar tyngka kata ïa u nongaikam bad ïa u nongbylla ruh.
“ ïa ka Nokma Committee la thung ha baroh kawei ka ri lum Garo ban peit bad pynïaid ïa kane ka kam. Yn pynsaja kat kum ki kyndon ïa kito kiba pynkheiñ kaba long ka rai jong ki Nokma kaba long ruh kat kum ki aiñ hi” ong biang u Bernard.
U la pynshai ruh ba ka Labour Licence ba la ai da ka tnad Labour kam lah ban ïa bujli ïa ka NOC jong ki Nokma. “ ïa ka Labour Licence donkam ban pyni tad hadien ba la ïoh jingbit ne ïoh shwa ïa ka NOC na ki Nokma ha kito ki jaka ba dei ban trei hapoh ka ri lum Garo” ong u Bernard.
U la ong ba ka Development Committee ba register kat kum ka State Societies Registration Act kim don bor ei ei ruh halor ki jaka puta ki Akhing bad kim lah ban ai ïa ka NOC.
Ka riti synshar ka long halor baroh. Ym don tnad ne bor ba la thaw ban long halor ïa ka Sixth Schedule. Baroh ki bor ki dei ban burom ïa ki bor synshar tynrai ne ki bor synshar shnong” ong u Marak.
Kumta ula kyntu ïa baroh ki nongaikam, ki kontraktor, ki kompani ne ki agency ba ki dei ban burom ïa kane ka hukum bad shim ïa ka NOC na ki Nokma shwa ban pyntrei ïa kano kano ka kam. Burom ïa ka bor bad iktiar jong ki Nokma namar ka long kumba burom ïa ka riti synshar jong ki trai ri trai muluk” pynkut u Marak.
The post Kyrshan pura u MDC Tura ïa ki Nokma ba daiñ kuna 10 hajar ïa ki nongbylla ba wan bylla khlem ïoh jingbit first appeared on Mawphor.