Shillong, Naitung 22 : U samla Kitkupar Nongsiej ba mihkhmat ïa ka Meghalaya ha ka lympung kaba heh bha ha ka pyrthei u la wanrah burom ïa ka ri India hadien ba u la khur lai tylli ki takma ksiar, ar tylli ki takma rnong bad ïa ka First Place Scholarship Award ha ka World Championships of Performing Arts (WCOPA) 2026 kaba la kut da ka jingpynhap pyrda ha Las Vegas, United States of America (USA).
Une u nongrwai ba kynsai tam ba ka jylla ka phah watla um shym la ïoh rah ïa ka nam Grand Champion Performer of the World, hynrei u dei tang ma u marwei uba mihkhmat ïa ka India ha ka jingïakhun phainal. Kumta u la paw kum uwei na ki nongïashim bynta ba kynsai tam jong ka ri ha kane ka lympung ïakob ba pawnam ha ka pyrthei.
Ha ka jingïakob bad ki nongïashim bynta na palat 70 tylli ki ri, u Kitkupar u la pynhun ïa ki nongbishar da ka sap rwai kaba kyrpang jong u ha bun jait ki kyrdan jingïakob. U la khur ar tylli ki takma ksiar bad ar tylli ki takma rnong ha ki kyrdan jingrwai bapher bapher, kaba pyni ïa ka jinglah jong u ha ka rwai, ka jingïeng ha rynsan bad ka jinglah ban pynpaw ïa la ka sap ha ka rukom kaba itynnad.
Shuh shuh, u la khur sa kawei ka takma ksiar hadien ba u la rung hapdeng ki san ngut ki nongrwai ba kynsai tam ha ka jingïakob Vocalist of the World Championship, kaba dei kawei na ki jingïakob kiba kham heh ha ka WCOPA. Kane ka jingjop ka la pynïeng ïa u hapdeng ki nongrwai ba kynsai tam ha kane ka lympung jong une u snem.
Ha kawei pat ka jingithuh kaba khraw, ka WCOPA ka la ai ruh ïa u ïa ka First Place Scholarship Award kum ka jingithuh ïa ka sap bad ka jingdon jingïkyrmen jong u ha ka kam Performing Arts. Kane ka scholarship kan plie lad ïa u ban ïoh jinghikai shuh shuh bad ïoh bynta ha ki prokram kiba kyrpang ha ka kyrdan jingïadei bad ka pyrthei.
“Ka jingïaid lynti jong u Kitkupar na Meghalaya sha ka rynsan ïakob jong ki ri ka pyrthei ka la long ka daw jong ka jingsarong ym tang ïa ka India hynrei khamtam ïa ka jylla Meghalaya, ïa ka thaiñ Shatei Lam Mihngi bad ïa ka jingïing Don Bosco. Ka jingjop jong u ka pyni ïa ka jingaiti lut, ka jinghikai kaba ryntih bad ka jingminot kaba khlem sangeh ban poi sha ka thong,” ong ka kyrwoh na u Rev. Fr. Michael Makri, MD jong ka dbmnTv, Shillong Don Bosco Youth Center, Laitumkhrah
Shuh shuh la ong ba watla ka nam Grand Champion Performer of the World kam shym la poi ha u, hynrei ka jinglah ban khur 3 tylli ki takma ksiar, 2 tylli ki takma rnong bad ka First Place Scholarship Award ka la pynskhem ïa ka kyrdan jong u kum uwei na ki samla nongrwai kiba don jingkyrmen tam jong ka India bad kum ka jingïai ai mynsiem ïa ki samla kiba don sap ha ka ri.
The post Haduh 3 tylli ki takma ksiar, 2 tylli ki takma rnong nalor ka Scholarship khur u Kitkupar ha ka WCOPA 2026, USA first appeared on Mawphor.