Shillong, Naitung 22: Ki khun ki hajar jong ka Hima Langrin kila leit ban tur kynsan sha ka ophis jong ka Khasi Hills Autonomous District Council ban pyrshah ïa ka jingthung Syiem biang ïa uba la shah sospon bad dawa ba dei ban pynhiar khet biang ïa u Nangtei Syiemiong.
Da ki spah ngut ki khun ki hajar jong ka Hima Langrin hapoh ka jingialam jong ka Seng Samla Hima Langrin kila poi ha phyllaw jong ka KHADC ban pynpaw ia ka jingpyrshah jur halor ka rai ba la shim da ka Council kaba la thung Syiem biang ia u Bah Nangtei Syiemiong.
Mar ia poi ha phyllaw jong ka KHADC ki enforcement mar mar kila khang noh ia ka khyrdop khang ba ki paidbah ba wan tur kin ym ioh lad satia ban rung shapoh bad ha kata ka por hi kala don ka jingïakhru bad sa khyndiat ka khyrdop ka lah jan lait kumba la jia teng mynshwa.
Hadien ba la ïa kren sngewthuh u CEM u la khot ia kren ïa ki nongialam bad ha kane ka jingialang na ka liang ki khun ki hajar jong ka Hima Langrin kila ïa kren ïa kiba bun ki mat bad ha kane ka jingïakren la pyntip ba kam shym la poi shano shano.
Haba kren sha ki paidbah hadien ba la kut ka jingialang bad u CEM, u Bah Wadladkyrpang Lyngdoh Langrin u la pynpaw ba ki la ai por 15 sngi ïa ka KHADC ba kan leh eiei ban weng noh ïa une u Syiem bad lada jia ba kam urlong kin sa wan biang ban shong shah thngan ha phyllaw jong ka KHADC.
Shuh shuh u la ong ba kila ïa kren shibun ki mat kiba ïadei bad ka jingujor ki jong ngi naduh u snem 2023 bad don ruh kiwei ki jingujor kiba la dep ban buh ha ki sngi bal ah dep ruh kumjuh bad la ïa kren ruh halor ka jingthung biang ka council ïa u Nangtei Syiemiong kum u Syiem ryngbah ka Hima.
“Ngi la pynpaw ba kum ki khun ki hajar jong ka hima da lei lei ruh em ngim lah ban pdiang ïa u Bah Nangtei Syiemiong ba un bteng biang ban long u Syiem u nongsynshar jong ka hima” u la ong bad bynrap “Na ka liang u CEM u la ong ba ïa mynta mynta kim pat lah ban pule ne beit bniah biang ïa ka file bad kila pan por ruh ka la long kyrkieh bad kila pan por na ngi” la ong u BahWadlad.
Shuh shuh u la pyntip ba u CEM u la bthah ruh ïa ngi ba lada ngi don ka lynti ban leit wad jingiarap ka shong ha ki bad ki paidbah jong ka Hima.
The post 15 sngi ai por ïa ka KHADC, byrngem ban wan shong shah thngan lada ym weng ïa u Syiem first appeared on Mawphor.