Shillong, Naitung 20: U Nongaibuid (Adviser) jong ka kynhun Cook-cum-Helper PM Poshan, Meghalaya, u Bah Khroo L Pariat u la kyrpad ïa u Myntri Rangbah duh bad ka Sorkar Pdeng ban pynkiew noh ïa ka bai nong kaba la neh ha ka juh ka dor mynta la palat 20 snem, haba maham ba lada ka Sorkar kam pynkiew, ki Cook-cum-Helper kin nym pyntreikam shuh ïa ka skhim PM Poshan.
Haba kren sha ki lad pathai khubor u Bah Pariat u la ong ba ïa ka bai nong kaba 900 tyngka shibnai na ka bynta 10 bnai ha ka shisnem ym pat shym la pynkiew mynta la palat 20 snem.
“Na ka liang jong ki Cook-cum-Helper PM Poshan jong ka Meghalaya bad ka thaiñ shatei lammihngi, ngi la wan shakhmat mynta ka sngi ban kyrpad ïa u Myntri Rangbahduh ka ri India ban pynkiew noh ïa ka bai nong” la ong u Bah Pariat.
U Bah Pariat u la ong ba ka kynhun ka la ïakynduh ïa ka Myntri ka tnat pla pisa ka Sorkar Pdeng ha ka jingwan jong ka ha Shillong.
“Ka la pyntip ïa ngi ba katei ka kam ka dang don hapoh ka jingbishar bniah da ka Ministry of Education bad Ministry of Finance ka Sorkar Pdeng hynrei ba ki don ki jingeh ha ka liang ka aiñ. Haba ngi la wad bniah, ka la kdew ba don kiba la leit sha ka ïingbishar” u la ong.
U la bynrap ruh ba ki nongïalam ba kynthup ïa u Symbud Myntri Rangbah u Bah Sniawbhalang Dhar bad u Myntri ka tnat Pule Puthi u Bah Lahkmen Rymbui ki la don lang ha kane ka jingïakynduh, bad ka Myntri ka tnat pla tyngka ka Sorkar Pdeng ha kaba kala kyntu ïa ngi ban long kiba ïaishah.
U Bah Pariat u la ban jur ïa ka jingnoh synniang jong ki Cook-cum-Helpers, ha kaba kiba bun napdeng jong ki, ki dei ki kynthei na ka thaiñ shatei lammihngi.
“Ki Cook-cum-Helpers ki la don ka bynta kaba khraw ha kaba pynwandur ïa ka pule puthi ha ka thaiñ, khamtam ha ki Primary School” u la ong.
Da kaba kdew ïa ka histori jong ka thaiñ, u Bah Pariat ula bynrap, “Shwa u snem 2000, ka thaiñ shatei lam mihngi ka la sakhi ïa ki kam lehnoh bad ki jingeh namar ka jingbym thikna ka shong suk shong shngaiñ. Hynrei hadien ba la pyntreikam ïa ka skhim PM Poshan khamtam ha Meghalaya bad ha kylleng ka thaiñ shatei lam mihngi, ngi la ïohi ba ki Primary ki ïarap bha ïa ki khynnah skul.”
“Kumta ka jingnoh synniang jong ki Cook-cum-Helpers lyngba u PM Poshan ka la ïarap ban teh lakam ïa ki kam lehnoh bad ka la noh synniang sha ka roi ka par jong ka imlang sahlang baroh kawei,” ula ong.
Ka kynhun ka la dawa ba dei ban pynkiew ïa ka bhah jong ka Sorkar Pdeng na ka 900 sha ka 9,000 tyngka shibnai, da kaba pyrkhat kyrpang ïa ka thaiñ shatei Lam Mihngi ha kaba ka rukom ai pisa ka long 90:10 hapdeng ka Sorkar Pdeng bad ki Sorkar Jylla.
U la kdew ba ka Meghalaya ka la dep ban kyntiew ïa ka bai nong badei ban siew na ka bhah jong ka Sorkar Jylla.
“Ka Sorkar Meghalaya hapoh ka jingïalam u Myntri Rangbah u Conrad K. Sangma ka la pynkiew ïa ka bai nong ha u snem 2022 na ka 100 tyngka sha ka 1100 tyngka ha ka shibnai na ka bhah jong ka Sorkar Jylla. Ka jylla Meghalaya mynta ka don ha ka kyrdan kaba nyngkong ha ka thaiñ shatei lam mihngi bad kaba 5 ha ka ri baroh kawei. Ka Kerala ka siew 12 hajar, ka Delhi pat ka siew 8000 tygnka.
U la ong ba ka Kynhun ka aiti da ka dorkhas sha u Myntri Rangbahduh bad sha ka tnad pule puthi bad ka tnat pla pisa ka Sorkar Pdeng halor kane ka mat jingdawa.
“Lada ka Sorkar Pdeng kam pynkiew ïa bai nong kaba la don bynta la palat 20 snem, ngi kum ka kynhun kaba don palat 20,000 ngut ki dkhot katkum ki rekod jong ka Sorkar Meghalaya, ngi la rai ban sangeh noh ban pyntreikam ïa ka skhim PM Poshan ha kane ka thaiñ” la maham u Bah Pariat.
“Ngim lah ban im da kane ka bai nong kaba ngi ïoh 900 tyngka na ka bhah Sorkar Pdeng.”
U la kyrpad ïa baroh ki MP jong ka Lok Sabha bad Rajya Sabha na ka thaiñ shatei lam mihngi bad ha kylleng ka ri India ba kin shim khia ïa kane ka kam ha kane ka dorbar synrai kaba dang shu sdang mynta ka sngi.
The post Na ka 900 sha ka 9000 tyngka dawa ki Nongshet bam ïa ki khynnah skul ha ka jylla first appeared on Mawphor.