Shillong, Naitung 21: Ka Meghalaya Pradesh Youth Congress (MPYC) ka la dawa ïa u President ka Meghalaya BJP Youth Wing uba la pynmih ha ki jingthoh jong u ha ki rynsan khubor paidbah ha kaba u la ong ba dei shu siat beit ïa kiba ïakhih hapoh Jantar Mantar kaba dangneh haduh kine ki sngi.
Ka MPYC ka la ong ba kum ka seng ka dawa ïa ka BJP Meghalaya ba kadei ban pynshai bad kumjuh ba kadei ban pynhiar shuki noh ïa utei u nongïalam uba ym don jingkitkhlieh ïa ki khun samla.
Haba kren sha ki lad pathai khubor ha ka sngi Baar ha ka jingïadonlang ki nongïalam ka seng ba kynthup ïa u Samla Derrick Jyrwa General Secretary, Jonathan Syiem Vice President, Banphira Basaiawmoit Chief Organiser, ki la pynpaw ka jinglynngoh ba kumno kum u briew uba tip ïa ka aiñ (Advocate) u dang pynmih na shyntur jong u ïa kine ki jingkren kaba ym don jingkitkhlieh bad kane ka la pynlehraiñ shibun ïa ka jylla halor kane ka jingkren jong u.
Ka Congress ka la pynpaw ba kumno kum u nongïalam jong ka BJP u pynmih kum ïa kitei ki kyntien ban shu phah siat beit ïa ki samla kiba ïakhih haduh mynta ka sngi ha Jantar Mantar bad kumjuh ba ki la kyrshan ïa ka jingshah thngan jong u Sonam Wanchuk kaba la ïaid mynta la palat 20 sngi.
“Kane ka jingkren jong u, ka la wanrah burom kaba pynsniew dur ïa ka jylla Meghalaya baroh kawei naba kum kane ka kyntien kam sngew ïadei dur eiei bad kum ngi pynrem jur ïa kane ka jingkren u nongïalam ki samla jong ka BJP bad ngi dawa ba ka BJP Meghalaya ka dei ban pynshai, ka dei ban pynhiar shuki bad kumjuh ruh ban suspen ïa une u nongïalam bad ban pynshitom da kaba tyngeh halor kine ki kyntien kiba la pynlait hapoh ka social media,” ong kitei ki nongïalam ka Congress.
The post Lyngngoh jur ka seng Congress ïa ka jingkren u nongïalam ba hakhmat jong ka BJP Meghalaya first appeared on Mawphor.