Shillong, Naitung 21 : U Myntri Rangbah Shri Conrad K Sangma mynta ka sngi ula pynïaid ïa ka jingïalang lyngba ka dur khih bad u Myntri ba dei khmih ïa ka Tnad General Administration Department (GAD) bad ki Heh Ophisar ka Tnad ban ïabishar halor ka jingïaid ki project jingtei kiba dang ïaid bad ba dang tyrwa, kiba ïadei bad ki Meghalaya House ha kylleng ka Ri.
Ka jingïalang kala bishar bniah ïa kaei kaba long ba man jong ki jingtei kiba dang ïaid bad ki jingtei pynheh, ka jingpyntrei ia ki Meghalaya House ba thymmai bad ka jingtreikam jong ki jingtei kiba la don lypa. Ka jingïalang kala ïakren shaphang ki project ha Delhi, Noida, Mumbai, Bengaluru, Vellore bad Kolkata, haba pynleit jingmut ia ka jingpynbha ia ki jingtei, ka jingai jingshakri bad ka rukom pynïaid kaba thikna.
U Myntri Rangbah ula bishar ia ka jingïaid ki kam jong kawei pa kaweika project, khmih bnïah ïa ka por bala buh ban pyn trei ïa ki kam, bad bthah ïa ki Ophisar ba kin pynthikna ba kin pyntrei ha ka pork aba biang haba pynneh ruh ïa ka jingtrei bha ïa ka kam. Ula ban jur ïa ka jingdonkam ka rukom pyrkhat (planning) kaba paka khnang ba kine ki jingtei kin lah ban pynbiang ïa ka jingdonkam ba nang bun jong ki nongshongshnong ka Meghalaya kiba leit shabar ka Jylla.
Ha kane ka jingïalang, ka jingïakren kala long eh halor ka jingpynkhlain ïa ka rukom pynïaid bad jingtreikam jong ki Meghalaya House khnang ban pynthikna ïa ka jingshakri ba kham bha na ka bynta ki samla pule, ki nongpang kiba leit wad jingsumar, ki nongtrei ka Sorkar bad kiwei kiwei ki nongshongshnong.
U Myntri Rangbah ula ban jur ïa ka jingkongsan ban pynneh ia kine ki jingtei kum ki jingtei kiba pdiang bad ba pynïaid bha, kiba shakri kum ki Iing ba shabar ka Jylla na ka bynta ki nongshongshnong ka Meghalaya.
Ula bthat ruh ïa ka Tnad ba kan ïai bteng ban peitthuh bha ia ka rukom pyntreikam ïa ki project bad ban pyntrei kloi ïa ki kam ba dang sah khnang ba kine ki jingtei bala tyrwa, kin lah ban dep noh hapoh ka por kaba la buh.
Kane ka jingbishar kam ka pyni ïa ka jingkut jingmut ba khlem sangeh jong ka Sorkar ban pynheh bad pynlong ïa ki Meghalaya kum ki jingtei ka juk ha baroh ki Sorbah ka Ri, kaban pynthikna ia ka jingsuk, jinglah ban ïoh bad jingshakri ban kyrshan na ka bynta ki briew jong ka Jylla haba ki leit jingleit shabar ka Jylla.
The post Shongbishar kam u Myntri Rangbah halor ka jingpyntrei ïa ki Meghalaya House ha kylleng ka Ri first appeared on Mawphor.